KALENJIN 146 - 170

  1.   Ongetien eng' bandanyo, Achek che ki'yanotin. Ongilosu Yetindet; Ine ne o eng' tugul. 2.  Kimi rutoito achek, Kibendi ga kipsengwet; Kigoit Emonoto Bik che kigondo koba. 3.   Ongetien achek tugul, Nganda mi ka-iimutik. Tuguk che uuen nguno Onai ole matebyei. 4.  Mat o'ywei, tupchosiechu, Ongegimegitu kot. Mitei Jesu ne ribech, Si ma'beetech bunyondet. 5.   Kagelakte che bo ng'ony, Kagegasin it, Inye; Kisubotin, Kiptaiyat, Ne I Kando-indennyo.

1.  Amache anai Jesu kot -  Inendet ne kimecha keny. Amache atesak inne Eng' naetab Yetindennyu.      Amache ng'alekyik;      Achame koneta      Siirei ng'alek alak tugul;      Mwawech agobo sobondo. 2.  Amache kineta ng'alek Che mitei Bukuit ne Tilil. 'Neta tugukab Jehovah Tamirmiriennyi ne Tilil. 3.  Amache agiilge inne Atese tai eng' orennyi. Ng'ang'wa Yetindet magennyi Agoi konyo kolaitoran.

1.   Kigonyo ng'ony Kiptaiyat Weritab Jehovah, Kigonyo kotoretech, komechi bik tugul; Ngot kiyan ng'alekyik ak kemete chalwogik, Kotun komutech kipsengwet.      Kibendi ga koretab Jehovah;      AK Ki boibo-en betusiek  tugul.      Kagiyan ng'alekyik: kagemete chalwogik.      Kisubi nguno Kiptaiyat. 2.  Kigonyo Yetindennyo kocheng'ech eng' luset, AK kogoitogei Inekobar bik che yaachen. Kigome komechi bik agot achek tugul, Amu kichamech Inendet. 3.  Kima esio komechech agot  nga ki kim kot; Kigome asi koek Aruetab Jehovah. Ma kebendi kapkoros kesa-e asista ; kisa-e Jehovah kityo.

1.  Ongenyiganitu kot, Kegas it Jesu. Ma Chang' bik betusiechu Che lumdogei iman.      Tiem iige Daniel      Ne Ki nyigan kot.      Mie imang'u Kiptaiat;      Konyit Ka,ennyi. 2.  Betos bik che Chang' inne Che ma'yanotin, Ago 'terteri choto Che 'mang'u Kiptaiyat. 3.  Nam songolietab Kristo Eng' lugoni o. Mi Jehovah koboten Eng' bandang'ung' tugul. 4.  Lumdege eng' Kiptaiyat; 'Terter o-indet. Egu ne nyigan inne Eng' sobeng'ung' tugul.

1.  Ongigiilge kebe gonnyo Ne mi kipsengwet. Mat ongenyalulse eng' yu; Ongigiilge kot.      Ong`eetye! Amat ongiywei      Ongebe gonnyo!      Kristo ko Kando-indennyo      Ongigiilge kot! 2.  Kigoib Jesu Inegei Tengekwogikyok. Inendet ko Yetindennyo Ne tun torochech. 3.  Mitei mestonok eng'  Oret - Richei bik alak. Mitei yomset ak  nyalilda Eng' oranato. 4.  Tinyei, iman, bichi-indo Oretab sobon; Ago ribech Kando-indet Si ma'nachech kiy.

I.    Mi  ta-innyo luget ak ko bichii Oret, AK komitei  tiemutik Che chang'; Ago Jesu Kristo kimnatennyo ne o Ne kitii-ege kotugul. Kigakto-i Jesu ne kamang'unennyo Ne Inendet Choruennyo iman. Lapkeiyet ne bo ng'ony Ng'olyondennyi ne Kim Ne ikweng`wech eng' orennyo. 2.  Kigonyo Jesu ng`ony eng` chamnyennyi ne o Nyo konyaliljech `agoi  kome. Ago chobwech nguno oldo eng` kipsengwet Ole mitei  ak  Kwandanyi. Ongetien eng oret ne iitech  kipsengwet; Magibestosi eng` bandanyo , Amu Jesu  Kristo  Lapkeiyenyo ne o Ne ikweng'wech eng' orennyo. 3.  Ongigilge anyun keboisiechi komie Ak kibarte chamnyenyi ne o. Ta kochang bik inne che mitei mesundei Che igeni kogas Ng'alek. Ongibarte Jesu betusiekyok tugul Amun yaachech bichoto iman Si koek Kiptaiyat Lapkeiyenywa ne o Ne igweng'jin sobonwekwak.

1.  Olaachi karikwok,' Askarikab Kristo. Otebi eng' nyiganatet Amu kimnatennyi. 2.   Ogimegitu kot Eng' Kiptaiyandennyo; Olaach karikab lugennyi Otertere tugul. 3.   Olaach eng' kayanet Kutwetab yetunet; Ogirinde bunyondeng'wong. Eng' kagiiletab ge. 4.  Otertere yomset Long'etab kayanet. Onetge Ng'olyot ne Sobei Ne rotwennyo bo chok. 5.    Otononse, anyun; Oripse eng' saet, Asi ogimegitu  kot Eng' Jesu Kiptaiyat.

1.  Ongebe askarik Che Kibo Kristo; Mi ta-innyo Jesu; ongisubote. Kagondo Kiptaiyat ole mi luget; Obwa kebe tai amu Ine Kando-indet.      Ongebe askarik che Kibo luget;      Kisuboti Jesu, Kando-indennyo. 2.  Lugoni Kitinye ko bo oindet; Mwee ine ye kasei Kainetab Jesu. Botani bunyondet ye gas Che-et Ne bo boiboiyetab tiedndab katerterisiet. 3.  Kanisetab Jesu -  kiroge  luget. Ongisub Kiptaiyat ne Kando-indet. Ki borto agenge; magibestosi. Kiborie lugoni o eng' kagiiletab ge. 4.  Ongebe tai tugul che kimi oret, Kisubi Inendet ne Kando-indet. Bo Laitoriat kondit ak telunatet; Nyoljin Kiptaiyandennyo kalosunet ne o.

1.  Indoiywech, Jesu Kristo, Bo-unindet ne o; Kitebye eng' oreng'ung' Kot kogesgei sobet. Ki-igimitech, Jesu, Eng' nyalulet tugul. Nguno kiyanin, Jesu, Igimitech agoi. 2.  Indoiywech, Jesu Kristo, Kot kogesgei luget, AK irat bunyondennyo Ne mitei ng'onyuni. Ilaaksewech kariguk Si kiterter luget Igonech kimnateng'ung' Kiterter o-indet. 3.   Indoiywech, Jesu Kristo, Amu I lapkeiyet. Ye kimi ak Inyendet Ketinye boiboiyet. Kisubotin, Yetindet, Agoi imutech gaa Nguno kilosun. Inye. Jesu, Kiptaiyandet.

1.  Kagonech Jesu  boisienyi Kemwaite yetunet, amu mi bik che lusyotin Che tom kogas ng'alek.      Kiyae boisienyi      Kiyae boisienyi      Kiyae boisienyi      Agoi komutech ga 2.   Boiboi inne bikab Jesu Che ya-ei magennyii Amu mi boiboiyet ne o Ye kase it komie 3.  Obwa, keyai boisiet Inne Ketoret bik alak, kerire bik Che nyalildos Koboto Che miandos 4.  Kigogochi Jesu borwekyok Koboto tugukyok Asi koboi tuguk Keya-e boisiennyi.

  1.  Yai bo-i-sieng'ung' nguno Eng' betusiek tugul, Amu magingen achek Ole boch sobet. 'Laach karikab lugoni Asi i-etege. Soman Ng'olyot   ne Tilil; Ripse eng' saet. 2.   Yai bo-i-siet eng' chamnyet Ne iboiboi Jesu. Egu chi ne kiyani Eng' bo-i-sieng'ung'. Amde ng'alekab Jesu; Kolse , inye, komie; Tun itu betut age Ne bo kesisiet. 3.  Yai bo-i-sieng'ung` rani Nyonei betut ne o! Negit koweek Kiptaiyat Si komut bikyik. Ye tun ka-it Inendet Kiboibo-itu kot. Namei bo-unatennyi Ak kolaitoran.

I.  I-ng'eet boisieng'ung' Eng' Tamirmirieng'ung'. I-giilech eng' ngolyondeng'ung' Kechuuljige inne.      I-ng'eet boisieng'ung',      kigutung'jinin ra.      nyo rong'wech Tamirmirieng'ung'.      Nyo si iberurech. 2.   I-ng'eet boisieng'ung', Eng' bik Che nyaluldos. Iluuchi chamnyeng'ung' ne o Che kigowegei let. 3.   I-ng'eet boisieng'ung', Igimit lagoguk. igochi bik kogas rubet Agobo ng'aleguk. 4.  I-ng'eet boisieng'ung', ltililech, Jesu. Inyiitwech Tamirmirieng'ung' Si keotin komie

1.   Atii-ege Jesu kityo Ne kigotumda korotik. mami mieindo ne yama - Imandab Jesu inegei.      Atonone Ruandet ne kim -      Noto Kristo Yetindennyu;      Noto Kristo Yetindennyu. 2.   Agot ngo itya nyalilda Atii-ege Ng'olyondennyi. Ye usa mising' ng'onyuni Amang'u kot kimnatennyi. 3.   Ayani arorutikyik Eng' usonet ak maranet. Agot ngo rarua toretet Atii-ege Jesu kityo. 4.  Tun kiboibo-Itu tugul Ko kagoweek Yetindennyo. Magiruokwech eng' betuno Amu mieindab Yetindet.

1.  Amang'u Kiptaiyandet Eng' betusiekyuk tugul. Nganda ming'in kayanet Amang'u Jesu Inegei.      Amang'u Jesu  Kristo;      Amang'u kota ami.      Agoi a-it kipsengwet      Amang'u Jesu kityo. 2.  'Kweng'wa muguleldanyu Tamirmiriet ne Tilil; Inendet  ne 'gimita Ngagochi Ine koboiywa. 3.   Atienoti eng' oret M'atiny  komi nyalilda. Yama Kando-indennyu; Amang'u Jesu Inegei. 4.  Amang'u Inendet kot; Amang'u eng' kotugul. Eng' betut anan kemoi Amang'u Jesu Inegei.

1.   Tia kalyetab Jesu Kristo Ne mi sobondanyu! Betwa ng'aleK che amwa-e Agobo kamuung'et.      Mitei kalyet muguleldanyu,      Nyiitat kalyet muguleldanyu;      Agot ngo yiema nyalilwogik      Amangu Yetindet. 2.   Akwong'e amu Kiptaiyat Ne kigogoitogei. Ki'ming'ingei agoi me-et Kosikwa yetunet. 3.  Ye kingo'stawa mesundei Kogona lapkeiyet. Mamitei kiy ne aroge Kwong'utiet ne te ni.

1.  Betut ne o ne kianam Ng'alekab Jesu Yetindet. Ki'nyiitwa muguleldanyu Boiboiyennyi ne o mising      O betut, o betut      Ne kiginyoiwa kaat tengek!      Abaibai kot mising' nguno      Eng' lapkeiyetab Jehovah.      O betut, o betut      Ne kiginyoiwa kaat tengek. 2.  Ayani mising' ng'alekyik; Nenyi sobondanyu tugul. Anetige ng'atutikyik - Inendet Konetindennyu. 3.  Nguno agakto-i Jesu, Inendet Toretindennyu. Achame eng' tuguk tugul Jesu Kristo Yetindennyu.

1.   Agot ye ating'e kalyet muguleldo, Anan ngo mi arogenet, Ma kiy ole katepto oretab ng'ony, Mitei kalyet muguleldanyu      Mi kalyet..., mi kalyet...,      Mitei kalyet muguleldanyu. 2.  Agot ngonyalila kot masambwanindet, Atebye, ane, eng' kalyet. Kitumda Jesu korotik eng' chamyet Kingogeera ami tengekto. 3.  Ki'yumji Jehovah chalwogik Werinnyi Koyaaktawech besendanyo. Abaibai nguno amu kigo-isto Nyigisindo ne kita nenyu. 4.  Jesu i-ngochok betunoto inyone Ye iweekse-i eng' bolik; Betut ne kigase igondit kocheei Koegu kayanet soitaet.

1.  Achame Jesu, Weritab Jehovah; Achame Jesu ne Toretindennyu; Achame mising' kosiir tuguk tugul, Amu kisib kochama Jesu, si kome.      Achame, achame Weritab Jehovah;      Amu kisib kochama Jesu, si kome. 2.  Kinyo inendet kosor bik eng' tengek; Kinyo komwaiwech logoiwekyik che miach. Ka'yan ng'alekyik; achame Inendet, Amu kisib kochama Jesu, si kome. 3.  Amu kichamech komechech Yetindet. King'eet eng' meet eng' betutab somok Achame inne eng' muguleldanyu, Amu kisib kochama Jesu, si kome. 4.   Mi Jesu nguno olin bo kipsengwet, Ak ta konyonei komutech kebe ga. Achame Jesu; agasige mising', Amu kisib kochama Jesu, si kome.

1.  Achame ang'alale ng'alekab kipsengwet - Lilindo ne bo Jesu koboto chamnyennyi. Achame ng'alechato - ng'alek Che bo iman; Yamei muguleldanyu kosiir tuguk tugul.      Achame ang'alale      Ng'alek che bo Jehovah.      Achame ang'alale      Ng'alechu mabegu. 2.   Achame ang'alale logoiywekab Jesu; miachen kosiir tahabu, ak tuguk che bo ng'ony. Achame ang'alale tuguk che kiyaiywa. Amwaitoti ng'alekyik amu kitoreta. 3.   Achame ang'alale boiboiyonito o; Kororonitu mising' ngabwati kotugul. Achame ang'alalji ichek che tom kogas, Amwachi logoiywechu bo Jesu, Yetindet. 4.  Achame ang'alalji ichek che kigonai, Amu amei emosto kota kogas kogeny. Ye tun ait kipsengwet, agasige inne, Atieni ak alosu Jesu, Yetindennyu.

1.  Nenyunet Jesu, nenyu iman;  Kiala Ine eng' korotikyik. Kisicha eng' Tamirmiriennyi,  Ak koganaba eng' eunnyi.      Atieni tiendo ne bo iman,       Ne atorore Yetindennyu.      Atieni tiendo ne bo iman.      Ne atienoti alosune. 2.  Agase it, ak abaibai kot Eng' rirenennyi ak mie-indanyi. Acheng'e tuguk che mi barak Che ineta Bukuit ne Tilil. 3.  Atinye kamuung'et eng' Jesu,  Kona Inendet kaberurennyi,  Chamei koteswa mie-indanyi,  Kota ageni nyonunennyi.

1.  Nda chechuk tugul ama mi Jesu Ko ma'muchi cho kotoreta Nee ne 'boibo-iti muguleldo Eng' tuguk che ta kobegu tun? Nda chechuk tugul ama mi Jesu Ko matilei kiy magornatet. Magiroge kiy sobondab koigeny, Agot chang'indab tugukab ng'ony 2.   Ngot kochama bik che bo ng'onyuni Ak ko len ichek a chi ne o, Egu buch anyun chomyoni tugul Ngo matun aite kipsengwet. Nda chechuk tugul ama mi Jesu Ne kicham komechi bik tugul, Asige ano yetindet age Ne imuchi kosorua iman? 3.  U melewet tugukab ng'onyuni Ngo matinyei chi Kiptaiyandet. Ma bobibo-en bik tugul che begu Ngo matinyei Jesu Yetindet. Nda achamegei ama bo Jesu Egu nee anyun ye ka-amei? Kagobunja anyun oldab oik, Ole ma anyoru yetunet! 4.  Baibai chi ne magorio eng' Jesu Tinyei kerichekab mugulel. Nyochin kaat Jesu chito chalwogik Nganda muruinen choto kosiir. Nda atinye Jesu kityo, Amatinye kiy age eng' ng'ony, Ko a magorio eng' ine mising'; Kagoyama Jesu inegei.

1.  Kigamen eng' Kenyisiek che chang' Ma'mage kiy meetab Jesu; Ma'yan ale kimecha Ine eng' Kalvari.      Kianyoru rirenetab ge      Ak ataach eng' yoto yetindet.      Kikitiach sobondanyu komie eng' Kalvari. 2.  Ki'borua sirutik ng'atutik Kota abotan amu chalwogik. Ak kobwat sobondanyu Jesu eng' Kalvari. 3.   Kiagochi Jesu kiy tugul, Abaibai eng' Kiptaiyandennyu; Ak amuchi rani atien tiendab Kalvari.

1.  Ki-ib Jesu chalwogik, Aruetab Jehovah; Asi ko'stawa milet Ne bo tengektanyu. Kiundawa Inendet Ng'ogiswekyuk tugul; Kitumda korotikyik Asi kotilila. 2.  Aipchini Kiptaiyat Banandanyu tugul. Inendet Kosobindet, AK ko Katiagindet. Jesu Kagaiga-indet Ne 'bukwa beekab kong'; AK kogesen Inendet Arogenosiekyuk. 3.    Anyorune kamuung'et Kiptaiyandet Jesu. Imutata eunnyi; Amuung`e tegennyi. Kararan kot Kainennyi - Kichame kot kegas. Imanuel Inendet Ne mitei kobotech. 4.  Amache kot aige Kiptaiyandet Jesu. Mie ine ak ko tala; Tinyei chamnyet ne o. Ago ne siirei tugul Ko arib kayanet, Si tun komuta Jesu kebe ga Kipsengwet.

1. Imuta Jehovah; mararua kiy; Amuunyi eng' oldanyi. Imutyina beek Che sistos; Isoobi sobondo.      Wisis milennyi, nyamnyum choginnyi:      Kiaguiye noto iman.      Indoiywa eng' betut ak kemoi      kona beekab sobon. 2.  Arirjinin, Jesu, imutata; Indoiywa eng' oreng'ung'. Amache asub imanit Agonyit Kaineng'ung'. 3.  Agot ye abune oldab me-et Tos a'ywe-i nee ne ya? Mami toptobenet nguno: Amite eunnyi.

1.   Kia u kechiriet,  ne kiabetoti, Kitom anyoru mestowot ne 'muchi kondoiywa. Kia berber inne, Ki-a-ombenoti; Kitom agas kuurset ne mie ne bo Mestowondet. 2.  Ago kicheng'a kot Mestowondonoto; Kicheng'ata eng' ui tugul asubi chalwogik; Kinyorua eng luset ko a betot inne, AK kiganabwa eng chamnyet anyonji akwennyi. 3.  Jesu ne riba kot, Ine ne kichama; I-undawa korotikyik ng`ogistanyu tugul. Kicheng'a konyorua, ane ne kiabet, AK komutwa anyo akwet si koriba mising 4.  Kia u kechiriet ne kima kase it; Ago asuboti nguno Jesu, Kandoindet. Ki-a-ombenoti eng' oretab tengek, Ago nguno ko mabete eng' gotab Kwandanyu.